रिठा

बाजारातून रीठा घेतले काही दिवसांपूर्वी. फोडत असताना, याचे काही उपयोग तुमच्यासोबत शेअर करावेसे वाटले. लहानपणी, आई रीठा पाण्याने केस धुताना ते पाणी नाकात जाणार नाही याची खबरदारी घेत असे, कारण डोळे चुरचुरत असत. ते पाणी नाकात गेले तर लूज मोशन होतात, असे तिच्या आईने तिला सांगितले होते. तिच्या आजोळी, केजला रीठ्याचे झाड होते, म्हणून बर्‍यापैकी रीठ्याचे उपयोग तिला माहीत होते.

रीठ्याचा उपयोग फक्त केस धुण्यासाठीच नाही, तर इतरही अनेक गोष्टींसाठी केला जातो. हे आई व आजीचे काही उपयोग सांगत आहे:

रीठा पावडरचा उपयोग नैसर्गिक डिटर्जंट म्हणून केला जातो. ती कपड्यांना स्वच्छ करते आणि त्यांचे रंगही टिकवून ठेवते. पैठणीसारख्या महागड्या साड्या रीठा पाण्यात धुतल्या जातात.शश

रीठा भांड्यावरील तेलकटपणा आणि डाग काढण्यासाठी उपयुक्त ठरतो.

रीठा पावडर त्वचेसाठी साबणासारखी वापरता येते. ती त्वचेला स्वच्छ, मऊ आणि निरोगी ठेवते, साबण न लावता.

सोनं, चांदी आणि इतर दागिन्यांवरील मळ साफ करण्यासाठी रीठ्याच्या पाण्याचा उपयोग केला जातो. हळदीमध्ये रीठा पाणी गरम करून, दागिने साफ केल्यास ते अगदी नवीन दिसतात, जणू दुकानातून आताच घेतल्यासारखे.

तुम्ही रीठ्याचे कोणते उपयोग करता, नक्की सांगा.

Suraj Kumari Goswami 

सुरजकुमारी गोस्वामी, हैद्राबाद